Mitoloxía Musical Asturiana
N'Asturies quedó'l recuerdu de bien de seres míticos rellacionaos, na so mayor parte, con delles de les fuercies naturales contemplaes yá polos nuestros ancestros; falamos del agua, la tierra, l'aire o'l fueu. D'esti mou, el panteón míticu asturianu nútrese de xanes, trasgos, nuberos, cuélebres, busgosos, diaños, güesties... y bien d'ellos más. Les hestories y lleendes que tienen como protagonistes a estos personaxes tresmitiéronse de xeneración en xeneración a lo llargo de los sieglos, les más de les veces al calor del llar. Modernamente, estos personaxes siguen presentes en campos como la etnografía, el folclor, la lliteratura o la música. Precisamente a eso, a les rellaciones ente la música y la mitoloxía n'Asturies vamos dedicar esti capítulu d'Al Son.