Elon Musk og frelsun fuglsins

Fuglinn er frelsaður, skrifaði Elon Musk, ríkasti maður heims, á internetið síðastliðinn föstudag. Fuglinn í þessu samhengi er samfélagsmiðillinn Twitter, frelsaður af Musk sjálfum, en kaup hans á miðlinum fyrir heila 44 milljarða Bandaríkadala gengu loks í gegn. Lógó, eða kennimerki Twitter, er blár tístandi fugl og færslurnar sem fólk skrifar á miðilinn eru alla jafna kölluð tíst, eða Tweet. Musk tísti sumsé að hann hefði frelsað fuglinn, tístarann. Hann gerði óskiljanlega hátt kauptilboð í miðilinn í apríl á þessu ári og var það samþykkt af stjórn Twitter. En síðan þá, í apríl, hefur ýmislegt gengið á. Musk hefur reynt að hætta við, það hafa komið upp málaferli, uppljóstranir og fleira. Snorri Rafn Hallsson fer yfir helstu vendingar í stóra Twittermálinu og skoðar fyrirætlanir Musks með þetta stóra og merkilega fyrirtæki.