Vera og dularfull dauðsföll rússneskra auðkýfinga

Nú standa yfir framkvæmdir og endurbætur hjá Þetta helst og á meðan á þeim stendur verða raddir valinna umsjónarmanna þáttarins dregnar fram. Vera Illugadóttir fjallar um dularfull dauðsföll rússneskra auðmanna. Þátturinn var fluttur fyrst 26. september 2022. Frá því í byrjun árs 2022 hafa margir rússneskir auðkýfingar og kaupsýslumenn fallið fyrir eigin hendi, eða þá fallið út um glugga og fram af klettum. Sérstaklega margir sem á einhvern hátt tengjast rússneskum olíu- og orkufyrirtækjum - grunsamlega margir, telja sumir, og hafa velt upp þeim möguleika að allavega einhverjum þessara manna hafi kannski verið komið fyrir kattarnef. Enda er það svosem þekkt að þeir sem setja sig upp á móti rússneska ríkisvaldinu geta átt það til að deyja sviplega og á dularfullan hátt. Þetta helst fer yfir dularfullu dauðsföll rússneskra kaupsýslumanna - og segir meðal annars af mönnum sem á árinu hafa svipt sig lífi eftir að hafa myrt alla fjölskyldu sína, stokkið eða dottið út um glugga á sjúkrahúsi, húrrað niður stiga í háskólabyggingu, og innbyrt eitrað kaffi og körtueitur í kjallara töfralæknis. Við mætum svo brakandi fersk til leiks innan tíðar, með nýtt og endurbætt Helst, á sama tíma og alltaf: strax að loknum hádegisfréttum á Rás 1.