Ne goode Stünnen

"Ne goode Stünnen" Dag ok, hier is de Klappmuul-Momsen. Ik hebb jüst’n beten Tiet, ne goode Stünnen, denn mööt mien Achtermann un ik los. Un nu weet ik nich, wann dat is, wann wi los mööt. Wo lang is denn ne Stünnen noch good un wann ward de schlecht? Weet ji dat? Man seggt dat jümmers eenfach so vör sik henn un geiht dorvon ut, dat all dat weet. Dorbi weet dat keen. Wiel, dat jo tosätzlich to de goode Stünnen ok noch de knappe Stünnen givt. Un ne knappe Stünnen kann ok ne goode Stünnen weden, wenn se richtig knapp is. Wenn se önnich knapp is, is se up jeden Fall bloots ne knappe Stünnen, wiel se vör ne goode Stünnen to knapp is. Aber wenn de goote Stünnen to good ward, kann se keene Knappe mehr weden. Und wenn de goote Stünnen veel to good is, ward se egentlich ne schlechte Stünnen, aber dat troot sik keen to seggen. So, un nu frag ik mi, wann dat kippt. Vun knapp to good un vun good to nich mehr good. Obwohl, wenn de Stünnen nich mehr good is, is se jo gor keene Stünnen mehr, denn sind dat up een mol wöller Minuten. Dorvon denn aber ganz veele. Tiet is doch relativ. Dat markt man hier mol wöller. Wenn ik Tein Minuten up’n Bus töven mutt, duert dat ewig und wenn ik bi ne Klassenarbeit bloots noch 10 Minuten heff, sünd de ruckzug rüm. Un so kann eene Stünnen gliek lang weden aber ünnerschedlich good! Un ne goode Stünnen kann jo ok teemlich schlecht weern, ok wenn se knapp is. Un wenn se richtig good is, ist dat mannichmol sogar ne grode Stünnen. Un de sleit denn bloots av un an mol. Villicht hett min Achtermann vondaag ok noch ne schwache Stünnen un gönnt sik so as gistern wöller Currywust-Pommes. Dat is för em denn ne richtich goode Stünnen. Hier gibt es mehr Plattdeutsch: Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC: https://www.ndr.de/wellenord/podcast3096.html Die Welt snackt Platt: Alles rund um das Thema Plattdeutsch: https://www.ndr.de/plattdeutsch